اسٹاف رپورٹ
اسلام آباد: آئل اینڈ گیس ریگولیٹری اتھارٹی (اوگرا) نے مئی 2023 کے لیے مائع پیٹرولیم گیس (ایل پی جی) کی قیمت میں 4.889 روپے فی کلو گرام اضافے کا اعلان کیا ہے۔
تفصیلات کے مطابق آئل اینڈ گیس ریگولیٹری اتھارٹی (اوگرا) نے ایل پی جی مزید مہنگی کرتے ہوئے مئی کے لیے قیمتوں کا نیا نوٹیفکیشن بھی جاری کر دیا ہے جس کے تحت پہلے ہی مہنگائی کی چکی میں پسنے والے عوام کو اب ایل پی جی کی قیمتوں میں اضافے کے نام پرایک جھٹکا دے دیا گیا ہے۔
اوگرا کے نوٹیفکیشن کے مطابق ایل پی جی کی قیمت میں 5 روپے فی کلو، گھریلو سلنڈر کی قیمت میں 58 روپے اور کمرشل سلنڈر کی قیمت میں 222 روپے کا اضافہ کیا گیا ہے۔
اب ایل پی جی 229 روپے کی بجائے 234 روپے فی کلو، گھریلو سلنڈر 2702 روپے کی بجائے 2760 روپے اور کمرشل سلنڈر 10397 روپے کی بجائے 10619 روپے میں دستیاب ہوگا۔
ایل پی جی کی قیمتوں میں اضافے نے عوام میں غم و غصے کو جنم دیا ہے، جو پہلے ہی مہنگائی اور زندگی کے بڑھتے ہوئے اخراجات کے اثرات سے نبرد آزما ہیں۔ بہت سے لوگوں نے حکومت کی پالیسیوں پر تنقید کی ہے، جن کا ان کا کہنا ہے کہ ایل پی جی کی صنعت کو بری طرح متاثر کیا ہے۔
ایل پی جی انڈسٹریز ایسوسی ایشن پاکستان کے چیئرمین عرفان کھوکھر نے حکومت سے مطالبہ کیا ہے کہ وہ ایل پی جی کی قیمتوں میں کمی کے فارمولے پر عمل کرے۔ انہوں نے حکومت سے مطالبہ کیا کہ عوام کو سستی گیس فراہم کرنے اور نقصانات سے بچنے کے لیے جام شورو جوائنٹ وینچر لمیٹڈ (JJVL) کا ایل پی جی پلانٹ فوری طور پر چلایا جائے۔
کھوکھر نے مزید کہا کہ ایل پی جی انڈسٹری ناقص پالیسیوں اور زیادہ ٹیکسوں کی وجہ سے بری طرح متاثر ہوئی ہے۔ انہوں نے تجویز دی کہ ایل پی جی کو ٹیکس فری بنایا جائے اور ایل پی جی پر غیر ضروری ٹیکسز کو ختم کیا جائے۔ انہوں نے اس بات پر بھی زور دیا کہ ایل پی جی واحد سستا ایندھن ہے جو قدرتی گیس کی کمی کو پورا کرنے کی صلاحیت رکھتا ہے۔
ملک میں تمام ایل پی جی ڈسٹری بیوٹرز اوگرا کی طرف سے مقرر کردہ قیمت پر ایل پی جی فروخت کریں، عرفان کھوکھر چیئرمین ایل پی جی انڈسٹریز ایسوسی ایشن پاکستان۔
