اسلام آباد: فیڈرل گورنمنٹ ایمپلائز ہاؤسنگ اتھارٹی (ایف جی ای ایچ اے) اور فیوچر ڈویلپمنٹ ہولڈنگز پرائیویٹ لمیٹڈ (ایف ڈی ایچ ایل) نے راولپنڈی میں کیپیٹل سمارٹ سٹی کے اندر 2 ہزار کنال اراضی پر ہاؤسنگ اسکیم کی تیاری کے لیے مفاہمت کی یادداشت پر دستخط کر دیے ہیں۔
بدھ کو اسلام آباد میں ہونے والی تقریب میں طے پانے والے معاہدے کے تحت منصوبہ لینڈ شیئرنگ ماڈل کے تحت تیار کیا جائے گا، جس کا مقصد وفاقی سرکاری ملازمین اور عام شہریوں کے لیے رہائشی سہولیات کی فراہمی ہے۔
ایف جی ای ایچ اے کے چیف انجینئر سید محمد حسن اور ایف ڈی ایچ ایل کے ایگزیکٹو ڈائریکٹر بریگیڈیئر (ر) محمد ندیم اسلم نے اپنے اپنے اداروں کی جانب سے مفاہمت کی یادداشت پر دستخط کیے۔
ایف جی ای ایچ اے کے ڈائریکٹر جنرل کیپٹن (ر) محمد ظفر اقبال کے مطابق نجی شعبے کے ساتھ شراکت داری کا مقصد دستیاب وسائل کو مؤثر انداز میں استعمال کرتے ہوئے معیاری اور جدید رہائشی منصوبوں کو فروغ دینا ہے۔
اتھارٹی کے ترجمان کے مطابق مجوزہ منصوبے سے راولپنڈی اور ملحقہ علاقوں میں وفاقی ملازمین کے لیے رہائشی سہولیات کی فراہمی میں مدد ملے گی۔
تاہم، معاہدے کے اعلان میں منصوبے کی تکمیل کی مدت، مجوزہ رہائشی یونٹس کی تعداد اور پلاٹوں یا مکانات کی متوقع قیمتوں کی تفصیلات نہیں دی گئیں۔
ڈی جی ایف جی ای ایچ اے نے بتایا کہ اتھارٹی کے اسلام آباد اور کراچی میں متعدد رہائشی منصوبے مکمل ہو چکے ہیں، جبکہ دیگر منصوبوں پر کام جاری ہے۔ انہوں نے جاری منصوبوں کو مقررہ مدت میں مکمل کرنے اور شفافیت یقینی بنانے کے عزم کا اظہار کیا۔
