مانیٹرنگ رپورٹ
اسلامی تعاون تنظیم (او آئی سی) کے سیکریٹری جنرل اسماعیل ولد شیخ احمد نے مکہ مکرمہ، مدینہ منورہ، طائف اور جدہ کو نشانہ بنانے والے حوثی حملوں کی شدید مذمت کرتے ہوئے مسلم دنیا پر زور دیا ہے کہ وہ اسلامی مقدس مقامات کے تحفظ کے لیے متحد اور ٹھوس مؤقف اختیار کرے۔
او آئی سی کی جانب سے جاری بیان کے مطابق سیکریٹری جنرل نے عرفات کے مقدس میدان کے قریب وادی المغمس کو بیلسٹک میزائل سے نشانہ بنانے کی اطلاعات پر خصوصی تشویش کا اظہار کیا۔
انہوں نے کہا کہ اسلامی مقدس مقامات کے قریب حملے ان مقامات کے تقدس اور شہریوں کی سلامتی کو نظرانداز کرنے کے مترادف ہیں۔
او آئی سی کے سیکریٹری جنرل نے خبردار کیا کہ ایسے حملوں کا تسلسل سنگین نتائج کا باعث بن سکتا ہے۔ انہوں نے اسلامی ممالک پر زور دیا کہ وہ حوثی ملیشیا کو مزید حملوں سے روکنے اور اس کی کارروائیوں کے خاتمے کے لیے مشترکہ، مضبوط اور ذمہ دارانہ مؤقف اپنائیں۔
انہوں نے سعودی عرب کے ساتھ او آئی سی کی مکمل یکجہتی کا اعادہ کرتے ہوئے ملک کی سلامتی، خودمختاری، علاقائی سالمیت اور شہریوں و مقیم افراد کے تحفظ کے لیے کیے جانے والے اقدامات کی حمایت کی۔
اسماعیل ولد شیخ احمد نے کہا کہ اسلامی مقدس مقامات کے تقدس کی خلاف ورزی پوری مسلم امہ کے لیے تشویش کا معاملہ ہے، جس کے خلاف عالمی سطح پر مؤثر ردعمل اور فوری اقدامات ضروری ہیں۔
انہوں نے حملے روکنے اور ذمہ دار عناصر کو جواب دہ ٹھہرانے کے لیے فوری بین الاقوامی کوششوں پر زور دیا۔
