اسلام آباد: وزیراعظم آفس اور کئی حکومتی شخصیات نجی کمپنی کے الیکٹرک کو واجبات کی ادائیگی کیلئے متحرک ہوگئی ہیں.
ذرائع کیمطابق وزیراعظم آفس نے پاکستان پوسٹ کو بجلی صارفین سے وصول شدہ 3.9ارب روپے کے الیکٹرک کو جلد اداکرنے کی ہدایت جاری کردی ہیں.
ذرائع کا کہنا ہے کہ پاکستان پوسٹ نے کے الیکٹرک اور پاور ڈویژن سمیت پاور ڈسٹری بیوشن کمپنیوں (ڈسکوز) کی تقریباً 8.765 بلین روپے کی بقایا رقم کو کلیئر نہیں کر رہی ہے، اس مسئلے کو حل کرنے کےلئے پاور ڈویزن نے وزیراعظم آفس سے مداخلت کی درخواست کی ہے۔
دستیاب دستاویزات کے مطابق پاور ڈویژن کی جانب سے کمیونیکیشن ڈویژن اور پاکستان پوسٹ کو بار بار کی درخواستوں کے باوجود بقایا واجبات 8.765 ارب روپے ہیں جن میں کے الیکٹرک کے 3.97 ارب روپے بھی شامل ہیں۔
دستاویزات میں کہا گیا ہے کہ “قانونی طور پر پوسٹ آفس ڈسکوزکی جانب سے وصولی کو برقرار نہیں رکھ سکتا، مزید کہا کہ” وزیر اعظم کے دفتر میں مداخلت سے اس مسئلے کو حل کرنے اور اس کی تکرار کو روکنے میں مدد مل سکتی ہے”۔
پاور ڈویژن کے ذرائع کے مطابق، کے الیکٹرک سمیت ڈسکوز نے پاور ڈویژن کو رپورٹ کیا ہے کہ پوسٹ آفسز نے جولائی 2021 سے اپنے بجلی کے بلوں کی وصولی برقرار رکھی ہوئی ہے اور جمع شدہ رقم انہیں منتقل نہیں کی، جس کے نتیجے میں کیش کی بڑی کمی واقع ہوئی ہے۔ . اور اس مسئلے کو حل کرنے کے لیے پاور ڈویژن نے کمیونیکیشن ڈویژن اور پاکستان پوسٹ کے ساتھ معاملہ اٹھایا ہے۔ نتیجتاً 28.765 ارب روپے کی بقایا رقم کے مقابلے میں 20 ارب روپے جاری کیے گئے۔ ذرائع نے بتایا کہ فی الحال کے الیکٹرک کے 3.97 بلین روپے (31-03-2022 تک) پاکستان پوسٹ کے پاس موجود ہیں۔
انہوں نے مزید کہا کہ جنرل پوسٹ آفسز (جی پی اوز) نے بجلی کے صارفین سے بجلی کے بل وصول کیے اور جمع شدہ رقم کو کے ای سمیت ڈسکوز کو ادا کرنے کے بجائے روک لیا۔
184
