آل پاکستان پٹرولیم پمپ اونرز ایسوسی ایشن نے پٹرولیم مصنوعات کی قیمتوں کا یومیہ تعین کرنے کی زیر غور تجویز مسترد کرتے ہوئے حکومت سے ماہانہ قیمتوں کا نظام نافذ کرنے اور بصورت دیگر ملک گیر احتجاج کی وارننگ دے دی۔
آل پاکستان پٹرولیم پمپ اونرز ایسوسی ایشن نے حکومت کی جانب سے پٹرولیم مصنوعات کی قیمتوں کا یومیہ بنیادوں پر تعین کرنے کی زیر غور تجویز پر شدید تحفظات کا اظہار کرتے ہوئے اسے پٹرول پمپ مالکان کے لیے ناقابل قبول قرار دیا ہے۔
ایسوسی ایشن نے اپنے بیان میں کہا کہ موجودہ ہفتہ وار قیمتوں کے نظام نے ہی پٹرول پمپ مالکان کو شدید مالی اور انتظامی مشکلات سے دوچار کر رکھا ہے، جبکہ یومیہ بنیادوں پر قیمتوں میں ردوبدل سے کاروباری غیر یقینی صورتحال مزید بڑھ جائے گی۔
بیان کے مطابق بار بار قیمتوں میں تبدیلی سے اسٹاک مینجمنٹ متاثر ہوتی ہے، مالی منصوبہ بندی مشکل ہو جاتی ہے اور پٹرول پمپ مالکان کو موجودہ ذخیرے پر مالی نقصان اٹھانا پڑتا ہے۔ ایسوسی ایشن کا کہنا ہے کہ مجوزہ نظام ان مسائل میں مزید اضافہ کرے گا۔
ایسوسی ایشن نے یہ بھی افسوس کا اظہار کیا کہ اتنے اہم پالیسی معاملے پر پٹرول پمپ مالکان سمیت متعلقہ فریقین سے مشاورت نہیں کی گئی۔ اس کا کہنا تھا کہ ڈاؤن اسٹریم پٹرولیم سیکٹر سے متعلق کسی بھی بڑے فیصلے سے قبل تمام اسٹیک ہولڈرز کو اعتماد میں لیا جانا چاہیے۔
آل پاکستان پٹرولیم پمپ اونرز ایسوسی ایشن نے حکومت سے مطالبہ کیا کہ یومیہ قیمتوں کی مجوزہ تجویز واپس لے کر اس کی جگہ ماہانہ بنیادوں پر قیمتوں کے تعین کا نظام متعارف کرایا جائے، جس سے کاروباری استحکام، بہتر اسٹاک مینجمنٹ اور مالی منصوبہ بندی میں مدد ملے گی۔
ایسوسی ایشن نے خبردار کیا کہ اگر اس کے تحفظات کو نظر انداز کیا گیا تو وہ اپنے آئندہ لائحہ عمل کا اعلان کرے گی، جس میں ملک گیر احتجاج سمیت دیگر آپشنز بھی شامل ہو سکتے ہیں۔
یہ بیان آل پاکستان پٹرولیم پمپ اونرز ایسوسی ایشن کے وائس چیئرمین نعمان علی بٹ کی جانب سے جاری کیا گیا۔
