سعودی عرب کے معروف ماہر آڈٹ عبداللہ صالح الشبیلی کو گلوبل آڈٹ کمیٹی سینٹر کے بورڈ آف ڈائریکٹرز کا چیئرمین مقرر کیا گیا ہے، جو کہ انسٹی ٹیوٹ آف انٹرنل آڈیٹرز (IIA) کی جانب سے واشنگٹن ڈی سی میں قائم ایک بین الاقوامی ادارہ ہے۔
یہ تقرری نہ صرف سعودی عرب کے لیے ایک بڑا اعزاز ہے بلکہ آڈٹ اور گورننس کے میدان میں مملکت کے بڑھتے ہوئے عالمی کردار کی بھی تصدیق کرتی ہے۔
عبداللہ الشبیلی اس وقت سعودی اتھارٹی آف انٹرنل آڈیٹرز کے چیف ایگزیکٹو آفیسر (CEO) اور عرب کنفیڈریشن آف انٹرنل آڈیٹرز کے سیکرٹری جنرل کے طور پر خدمات انجام دے رہے ہیں۔ ان کی تقرری عالمی سطح پر سعودی ماہرین کی قابلیت، پیشہ ورانہ صلاحیتوں اور قیادت پر بڑھتے ہوئے اعتماد کی عکاسی کرتی ہے۔
انسٹی ٹیوٹ آف انٹرنل آڈیٹرز کے مطابق، عبداللہ الشبیلی کی تقرری ان کی غیر معمولی پیشہ ورانہ خدمات، IIA کے عالمی پروگرامز کی ترقی میں نمایاں کردار اور خطے میں داخلی آڈٹ کے ادارہ جاتی ڈھانچے کو مضبوط بنانے کی کوششوں کے اعتراف کے طور پر عمل میں لائی گئی۔
ادارے نے اس بات کو بھی اجاگر کیا کہ سعودی اتھارٹی آف انٹرنل آڈیٹرز نے خطے میں آڈٹ کے شعبے کو جدید خطوط پر استوار کرنے، گورننس کے معیار بہتر بنانے اور شفافیت کو فروغ دینے میں کلیدی کردار ادا کیا ہے۔
گلوبل آڈٹ کمیٹی سینٹر، جو دنیا بھر میں آڈٹ کمیٹیوں کے طریقہ کار، قانون سازی اور بہترین طرزِ عمل کا مرکزی ماخذ ہے، اس تقرری کے بعد سعودی عرب کو آڈٹ گورننس کے عالمی نظام میں ایک مؤثر شراکت دار کے طور پر تسلیم کرتا ہے۔
یہ پیش رفت سعودی وژن 2030 کے اہداف سے ہم آہنگ ہے، جس کے تحت مملکت کا مقصد عالمی معیار کی کارپوریٹ گورننس، شفافیت اور احتساب کو فروغ دینا ہے۔
ماہرین کا کہنا ہے کہ عبداللہ الشبیلی کی تقرری مملکت کے لیے بین الاقوامی سطح پر آڈٹ اور گورننس کے شعبے میں قیادت کا نیا باب ثابت ہوگی، جس سے سعودی ماہرین کے لیے عالمی اداروں میں مواقع کے دروازے مزید کھلیں گے۔
ٹٰیگز:
